Mar 2 | MED | STEP | Rumbᵾⱡ kat omba puⱡnga, wote Jisas kelpa Kaperniyum kona yant urum. Wote, wamp nimbᵾ ndi, pᵾtᵾng mel, Jisas ni omba mang kona morum nᵾtᵾng.

Mark 2

Jisas On Por Murum Wu Ti Etpa Kai Itim

1 Rumbᵾⱡ kat omba puⱡnga, wote Jisas kelpa Kaperniyum kona yant urum. Wote, wamp nimbᵾ ndi, pᵾtᵾng mel, Jisas ni omba mang kona morum nᵾtᵾng. 2 Wamp ama puⱡi oⱡᵾngina, manga ni ti nimba murum. Wote pena orunga, manga keta kona nimbᵾ pᵾkᵾ, ti nitim ku. Wote Jisas ndi, Got nga ik mong nimbᵾ, wamp mbᵾ nimba ngurum. 3 Ni kᵾn, wu tᵾmbᵾkak kat ndi, wu kᵾmp ki kit murum ti rupⱡaima kulk mek, Jisas murum nila orung. 4 Wu ni kᵾⱡ ndi, wu ni kapⱡa mek, Jisas murum ila nondpa pi naprᵾng. Ei nambuⱡ emel, wamp minal ei ndi, kona ti nitim. Wu ni kᵾⱡ ndi, wu ni mek, manga im ila oⱡa puk, Jisas murum kona nila kun rok tᵾk oⱡa nduk, wu rupⱡaima ila pitim ni, kunda tᵾk, Jisas murum kona nila mana ndurᵾng. 5 Jisas ndi, wu tᵾmbᵾkak kᵾⱡ nga mondpa pili uⱡ ila kandpa kᵾn, on por murum wu ni, kundpa nimba mel, “Na nga kang ye! Nim nga uⱡ kit mbᵾ wak rondᵾnt,” nitim. 6 Ui ei kᵾn, Moses nga mi ik mbo wu mat morung nimbᵾ ndi, en enim numan tᵾk mundᵾk, i nᵾk pᵾtᵾng, “Nambuⱡ emel, wu ei ndi, ik i etpa ninim? Wu ei, Got nga ik mbuldung orunga nindinim. Wamp ti ndi, kapⱡa uⱡ kit mbᵾ, wak rondᵾmba mel mon. Got wu

tenda ei ndi, kapⱡa etmba,” nᵾtᵾng.
8 Wu kᵾⱡ nga numan rukᵾr orunga pᵾtᵾng uⱡ kᵾⱡ, Jisas ndi, kandpa pilpa kᵾn, wu kᵾⱡ kundpa nimba mel, “Nambuⱡ emel, enim uⱡ kᵾⱡ nga numan ou nduk pᵾnmin? 9 On por mul wu ei kundᵾp nump mel, ‘Nim nga uⱡ kit mbᵾ, wak rondᵾnt nᵾnt,’ muna, ‘Oⱡa molkᵾn, nim nga rupⱡaima kᵾⱡ tᵾkᵾn mekᵾn okᵾn, pi nᵾnt ik mong ei, ik mong nant ei mbun enim?’ 10 Na ndi etamba enim kᵾning ei, na Muⱡᵾl Wu Kupa ei ndi, mana mᵾi kona ila uⱡ kit mbᵾ, wak rui uⱡ ei nga ronduⱡ ei tep mor,” nitim. Wote Jisas ndi, on por murum wu ni kundpa nimba mel, “Na ndi, nim kundᵾp nᵾnt, oⱡa molkᵾn, nim nga rupⱡaima kᵾⱡ, tᵾkᵾn mekᵾn okᵾn, mang kona pi!” nitim.

12 Wamp nimbᵾ pora kandᵾk moⱡᵾnggina, wu ni oⱡa moⱡpa, elim nga rupⱡaima kᵾⱡ, tᵾpa mepa tᵾkrᵾpa omba purum. Wamp nimbᵾ min ngᵾn minal mundᵾk, Got kᵾn ambulk palk nᵾk mel, “Tᵾn uⱡ i etpa ti, unt kᵾni nakᵾndᵾrmᵾn, mon!” nᵾtᵾng.

Jisas Ndi, Wu Lipai Wi Ropa Titim

13 Jisas ni, num Galili ᵾldᵾ ila aldpa int purum. Wamp ama puⱡi murung kona nila oⱡnga, Jisas ndi puⱡ mondpa wamp nimbᵾ, ik mbo inditim. 14 Wote Jisas ni, mba kᵾndrᵾm mel, ku takis ti, wu Lipai ni, wu Alpiyas nga kangᵾm ni, elim nga kongun etᵾm manga nila murum. Jisas ndi, wu ni, kundpa nimba mel, “Nim na punt ila pep, rokᵾn ui!” nitim. Lipai ni, oⱡa anggilpa, Jisas pep ropa purum.

15 Wote, Jisas ni epindama mba, wu Lipai nga manga nila rᵾng nurum. Rᵾng norung kona nila, ku takis titmin wu puⱡi kᵾn, uⱡ kit mbᵾ nga etmin wu mat ou ndupa kᵾn, Jisas elim nga kitip kᵾni wu mbᵾ kᵾn, wote wamp puⱡi, Jisas pep rorung nimbᵾ, kunda mou rok morung.

16 Perisi wu kᵾⱡ kᵾn, mi ik mbo wu kat molk kandrung mel, Jisas ni, uⱡ kit etmin wu nimbᵾ kᵾn, ku takis tᵾtᵾng wu nimbᵾ kᵾn, moⱡpa rᵾng noⱡnga, kandᵾk kᵾn, Jisas nga kitip kᵾni wu nimbᵾ, waldᵾk nᵾk mel, “Nambuⱡ emel, Jisas wamp i etpa mbᵾ kᵾn, moⱡpa rᵾng tenda ila nonum nda?” nᵾtᵾng.

17 Jisas ndi, ik kᵾⱡ pilpa kᵾn, punt ropa nimba mel, “Wamp ti kui rui narᵾrᵾm ei, dokta morum ila, pi napᵾrᵾm. Wote, kui rorum wamp mbᵾ mint purmin. Na ya ur ei, wamp kai mbᵾ, etᵾp timp nᵾmp ui nᵾwᵾr mon! Wote, wamp kit mbᵾ etᵾp timp pilip ur,” nitim.

Rᵾng Mowi Pi Uⱡ Ei Nga Waldᵾtᵾng

18 Ui ti kᵾn, wamp nu tindi wu Jon nga kitip kᵾni wu kᵾⱡ kᵾn, Perisi wu kᵾⱡ kᵾn, rᵾng mowi petᵾng. Wamp mat ndi ok, Jisas waldᵾk nᵾk mel, “Nambuⱡ emel, wamp nu tindi wu Jon nga kitip kᵾni wu kᵾⱡ kᵾn, Perisi wu mbᵾ nga kitip kᵾni wu kᵾⱡ, rᵾng mowi pelingina, wote nim nga wu kᵾⱡ rᵾng mowi pi napᵾtmin ei ka!” nᵾtᵾng. 19 Jisas ndi, punt ropa nimba mel, “Wote, enim etᵾk pinmin mel nant? Amp tᵾmba wu ei nga rᵾng koim ila wamp tᵾma ong mbᵾ, rᵾng nui nᵾning ye? Mon ei ka! Wote, amp tᵾmba wu ei, wamp mbᵾ kᵾn, kunda molk kᵾn, wamp mbᵾ, kai pilik kapⱡa rᵾng nuing. 20 Wote, ui ti om kᵾn, wamp mbᵾ mondᵾk kelik, amp tᵾm wu ei mek pung ei kᵾn, wamp mbᵾ, wu ei nga kont itangga rᵾng mowi ping. 21 Wamp ti ndi, muⱡ ni kont ti tᵾpa, wal pᵾki unt nga kat mbila, nᵾtᵾm ila pendpa ropa rumbᵾⱡi nambrᵾm. Wote, i en ndam, muⱡ ni kont pendpa ropa rambrum ei, ronduⱡ mba wal pᵾki unt nga kᵾⱡ, mepa rᵾk omba ondpa ou ndurum.

22 Wamp ti ndi, nu wain kont ei tᵾpa kng meme kᵾng ming unt nga ila oi ndupa mundi namᵾndrᵾm. Ei nambuⱡ emel, oi ndum ndam, nu wain kont ei ndi moⱡpa, kng meme kᵾng unt nga kᵾⱡ nomba mbila ndumba? Ei kᵾn, mel raⱡ kunda kunda etpa, kit moⱡmba. Ei mon! Nu wain kont ei, kng meme kᵾng ming kont ila oi ndurmin,” nitim.

Mowi Kor Ei Nga Waldᵾtᵾng

23 Mowi kor mormin wi ei kᵾn, Jisas ni, rᵾk wit pana tila omba purum. Elim nga kitip kᵾni wu ni kᵾⱡ, kunda orung ei ndi, wit mong mat oldᵾk tᵾtᵾng. 24 Wote, mi ik pep rui wu Perisi ni kᵾⱡ ndi, Jisas kundᵾk nᵾk mel, “ Tᵾn nga mi ik ei ndi, nimba mel, mowi kor kᵾn kongun iti nᵾtᵾi, mon nimba petᵾm. Wote, nim nga wu kᵾⱡ ndi, kongun enmin ei ka!” nᵾtᵾng.

25 Jisas ndi, punt ropa nimba mel, “Enim King Depit nga itim timan kᵾⱡ, kᵾmp rok kandᵾrmin muna mon? Elim kᵾn, elim nga kunda rup rok andrᵾng wu kᵾⱡ kᵾn, kunda kump kun kurung ei kᵾn, King Depit ndi, Got nga manga wingti ila mukᵾr mba, Got nga bret angge nᵾk ngurung mbᵾ tᵾpa nurum. I itim ei, Apitar ni wu ei, pris kᵾⱡ nga kuimbal murum ei kᵾn itim. Tᵾn nga mi ik ngurum ei ndi, bret ei pris kᵾⱡ mint tᵾk ning nᵾtᵾm. Ni wote, Depit tᵾpa numba, elim nga wu mbᵾ nguⱡnga norung ku,” nitim.

27 Wote Jisas ndi, nimba mel, “Mowi Kor ei, wamp nga molk kai munding ei nga nindpa inditim. Wamp ei, Mowi Kor ei nga nindpa indi nᵾndᵾtᵾm mon! 28 Ei nga, Muⱡᵾⱡ Wu Kupa ei, mowi kor mormin ui ei nga Wu Nuim ei,” nitim.